Malia ser simpatizante do BNG dende hai anos nunca sentín interese por participar activamente da política. Non foi ata un ano despois de emigrar a Alemaña cando gañei conciencia sobre a necesidade de sumar forzas para reivindicar e defender a nosa terra e a nosa cultura fronte ao proceso colonizador cada vez máis forte na Galiza.

Malia aos poucos recursos cos que contamos a ilusión e o desexo de contribuír ao proxecto do BNG fai que nos manteñamos activos e en contacto continuo, con asembleas periódicas e tentando manter á poboación galega emigrada en contacto coa actualidade do noso país a través das redes e incluso eventos presenciais. O movemento independentista dende a emigración vívese dunha maneira moi distinta a como se fai na propia terra; ás veces tomar certa distancia permítenos ver as cousas dunha maneira máis clara, e por iso penso que a militancia na emigración temos moito que aportar ao proxecto.

Penso que participar activamente da militancia é a mellor maneira de confrontar a realidade que cada día nos chega dende o noso país, non deixando oco á resignación nen ao pesimismo. Coñecer a parte da xente que dende o estranxeiro traballa cada día por unha Galiza mellor non fixo senón reforzar a miña ilusión polo proxecto do BNG.